We can provide
documents in Te Reo
with English
translations if required.
Introduction
E whakapono ana a Perpetual Guardian kia kaua te reo e noho hei tauārai ki te whiwhi i te tiaki ā-ture, me te mauritau, ka whakaratohia e tētahi Tiakitanga, Wira, me te Whai Whakamana ā-Ture Mauroa hou tonu kua tuhia tōtikatia. He kaimahi ā mātou e mātau ana ki ngā hiahia a te Māori, e ū ana anō hoki ki te āwhina i a koe ki te kōwhiri i ngā mea tika māu, mā tō whānau hoki. Ka taea hoki te whakarato tuhinga i te reo Māori me ngā whakamāoritanga reo Ingarihi ki te hiahiatia.
Whakapā atu ki a maatua i [email protected] ki te hiahia koe ki te matapaki i ētahi o ā mātou ratonga, tae atu ki:
Ngā Tarahiti:
He maha ngā āhua me ngā rahinga o tēnei mea, te tarahiti. He hira te tarahiti, he mea tōtika ki te whakawehe me te tiaki i ō rawa.
Ka taea e te Tarahiti:
- Te tiaki ō rāwa;
- Te pare tō āhua noho i ngā mōrearea e pā ana ki te pakihi;
- Te whakarato rawa mā ō pararau pēnei i ō tamariki me ō mokopuna (hei tauira, mō tō rātou mātauranga, mēnā kua whai hauātanga ā-tinana, ētahi atu momo hauātanga rānei);
- Te whakaū kia noho pūmau tonu ki te whānau ērā mea nō te whānau;
- Te pare ngā rawa ka kawea e koe i roto i te mārenatanga, i te hononga noho tahi rānei;
- Te whakarato tautoko ā-pūtea mauroa ki tētahi kaupapa atawhai;
- Te penapena me te whakatipu i ō rawa haumi me te whakarite kia tukuna iho ēnā ki tō whānau; ā,
- Te whakawhāiti i ngā kerēme ki ngā rawa i muri i te matenga.
Ehara i te mea me matatini te tarahiti, ka taea te whakarite kia ngāwari, kia mārama. He mātanga whai pūkenga, takohanga, mōhiotanga tauwhāiti ō mātau mō te tohutohu i a koe ki tētahi Tarahiti hei whakatutuki i ō whāinga i tēnei ao hurihuri tonu. Ka taea hoki e ō mātou mātanga te arotake tō Tiakitanga o nāianei kia whakaū kia puta pai i te titiro ngaio, kia mauroa anō hoki.
Ngā Wira
Ko tēnei mea te wīra he whakaaturanga ā-ture o ō hiahia ka pā tika ki ērā o ō tino whanaunga. Ka tuku i a koe ki te whakarite kia horaina ō rawa ki tāu e hiahia ai i tō matenga. Ko tā te Wira hou, i tika anō tāna tuhi mai, he karo i te rangirua, te akaaka me te utu mō te whakahaere i ō pānga tuku iho.
Me whai Wira koe ki te:
- Whakarite kia haere ō rawa nāu i whakapau kaha ki te whiwhi ki a rātou e kōwhiri koe.
- Whakatū i tētahi ka whakarite kia tutuki ngā kupu o tō Wira.
- Whakarite kia mārama ō hiahia ina mate koe, arā, ō hiahia mō te nehu i a koe.
- Whakatū i te kaitiaki mō ō tamariki.
- Whakatutuki i ētahi atu hiahia pēnei i te whakarato pūtea mō te mātauranga o ō mokopuna, te takoha moni rānei ki tētahi kaupapa atawhai.
Te Whai Whakamana ā-Ture Mauroa
Ko tā te Whai Whakamana ā-Ture Mauroa (e mōhio whānuitia ana hei EPA (Enduring Power of Attorney)) he āwhina ki te pare atu i ngā tūāhuatanga tē kitea mā te tuku i tētahi tangata, tētahi whakahaere rānei, e kīia ana he ‘tangata whai whakamana ā-ture’, hei māngai mōu, ki te hiahiatia. Ka hiahiatia pea he tangata whai whakamana ā-ture i ngā āhuatanga:
- Kei tāwāhi koe, ā, ka hiahia ki tētahi tangata ki te hoko mai, hoko atu rānei i ngā rawa, pūtea haumi rānei māu; tērā rānei,
- He māuiui whakangoikore, he wharanga rānei tōu tērā ka ārai i tō mahi mōu anō (hei tauira, mēnā ka mauri ngaro koe, ka kutukutu ahi i te kirikā ranei).
E rua ngā momo EPA, ko tētahi mō Ngā Rawa me tētahi mō te Whaiaro me te Toko i te Ora. Kōrero mai ki tō mātou kapa kia kite me pēhea te tiaki a ēnei mea i a koe me tō whānau. He rōpū hira o ngā kaiwhakahaere kiritaki tō mātou puta noa i Aotearoa e tautokona ana ki tētahi rōpū ā-ture mākohakoha, nā reira e mōhio ana mātou ka whiwhi koe i ngā tohutohu tino pai rawa e wātea ana.
Tiakina ō mea i tēnei rā tonu.
